बैतडी : ९ वटा स्थानीय तहका केन्द्रमा प्रहरी चौकी

प्रकाशित मिति : शनिबार, फाल्गुन २५, २०७५

बैतडी । बैतडीका स्थानीय तहका केन्द्रहरुमा प्रहरीले चौकी स्थापना गर्ने कार्यलाई तीव्रता दिएको छ ।

सिगास गाउँपालिकाको केन्द्र गर्जेबाहेक सबै स्थानीय तहका केन्द्रमा प्रहरीचौकी स्थापना भएका जिल्ला प्रहरी कार्यालय बैतडीका प्रमुख प्रहरी नायव उपरीक्षक नेत्रमणि गिरीले जानकारी दिनुभयो ।

स्थानीय तह भएपछि पञ्चेश्वर, शिवनाथ र सुर्नया गाउँपालिकाका केन्द्रमा प्रहरीचौकी स्थापना गरिएका उहाँले जानकारी दिनुभयो ।
सिगास गाउँपालिकाको केन्द्र गर्जेमा पनि अस्थायी प्रहरीचौकी स्थापनाका लागि जिल्ला प्रशासन कार्यालय मार्फत गृहमन्त्रालयमा लेखी पठाएको प्रहरी नायव उपरीक्षक गिरीले जानकारी दिनुभयो ।

स्थानीय तहमा शान्ति सुरक्षा स्थापनाका लागि तहका केन्द्रहरुमा प्रहरी चौकी स्थापना गरिएका उहाँले बताउनुभयो ।

६ ओटा तहका केन्द्रमा भने तह सञ्चालनमा आउनुअघि नै प्रहरीचौकी रहेका थिए । स्थानीय तहका केन्द्रमा प्रहरीचौकी स्थापनाले शान्ति सुरक्षामा सहयोग पुग्ने सुर्नया गाउँपालिकाका अध्यक्ष बीरबहादुर बिष्टले जानकारी दिनुभयो । -उज्यालाे